Rektori Vataj priti në takim Ambasadorin e Austrisë, Gernot Pfandler
24 Prill 2018
Ambasadori i Austrisë në Prishtinë, Gernot Pfandler, të martën ka vizituar Universitetin “Ukshin Hoti” në Prizren, ku është pritur nga Rektori Prof. Dr. Ramë Vataj dhe shefja e Degës së Gjuhës Gjermane në Fakultetin e Filologjisë, Prof. Dr. Kimete Canaj.
Rektori Vataj shprehi nderin dhe kënaqësinë që pret në takim ambasadorin e një shteti që ka mbështet Kosovën në shumë procese të rëndësishme dhe ka dhënë mbështetje të madhe për themelimin dhe zhvillimin UPZ-së. Ai falënderoi ambasadorin për sjelljen e profesorëve dhe për dhurimin e një fondi të konsiderueshëm të librave, duke shprehë zotimin se së shpejti në UPZ do të formohet këndi austriak.
Ambasadori Pfandler theksoi se bashkëpunimi mes UPZ-së dhe Ambasadës së Austrisë në Prishtinë ka dhënë frytet e veta duke theksuar mbështetjen e UPZ-së përmes donacioneve të ndryshme, si me kuadro përmes OEAD, dhurimin e një fondi të konsiderueshëm të librave, etj.. ”Donacionet e tilla kërkojnë partner serioz dhe realizmi i tyre nuk do të ishte i mundur pa një menaxhment të këtij niveli që e ka UPZ me kuadrin përkatës”, theksoi Ambasadori i Austrisë. Ai shtoi se lektorja austriake në UPZ, Martina Dreshter ka marrë një iniciativë për grumbullimin e librave për UPZ-në, duke sjellë mbi 2 mijë tituj.
