Prorektori Yildirim priti në takim përfaqësuesit e DokuFest
26 Nëntor 2019
Prorektori për bashkëpunim ndërkombëtar dhe ngritje të cilësisë, Prof. Ass. Dr. Soner Yildirim, me bashkëpunëtorë të martën ka pritur në takim znj. Linda Llula Gashi drejtoreshë ekzekutive e Festivalit Ndërkombëtar të Filmit të Shkurt dhe Dokumentar (DokuFest) dhe z. Eroll Bilibani – Drejtor i DokuLab.
Në takim është diskutuar për zgjerimin e bashkëpunimit në mes të DokuFest dhe UPZ për bashkë organizimin e Shkollës Verore Ndërkombëtare në UPZ dhe projekte të përbashkëta. Përfaqësuesit e të dyja palëve shprehën gatishmërinë e tyre për të vazhduar bashkëpunimin e gjertanishëm në fusha tjera në interes të përgjithshëm.
DokuFest dhe UPZ kanë pasur bashkëpunim të frytshëm deri më tani, në kuadër të projektit “Prezantimi i qasjeve të reja në edukimin shoqëror II”, i cili është realizuar me sukses bashkë me partnerët rajonal dhe ndërkombëtar.
Bashkëpunimi për organizimin e shkollës verore ndërkombëtare, aplikimi për realizimin e projekteve të përbashkëta dhe në aktivitete jashtë korrikulare kontribuon në promovimin e universitetit në këto fusha shumë të rëndësishme.
DokuFest, Festivali Ndërkombëtar i Dokumentarëve dhe Filmit të Shkurtër, është festivali më i madh i filmit në Kosovë. Çdo vit, festivali sjell kinematë dhe vendet e ekspozimit të ekranit, rreth qendrës historike të qytetit të Prizrenit një përzgjedhje prej më shumë se 200 filmave të zgjedhur me dorë nga e gjithë bota.