Fakulteti i Filologjisë i Universitetit “Ukshin Hoti”, më 24. 02. 2020, organizoi përurimin e librit "Shoqëri e të Shtypuri Shkronja shqip"
05 Mars 2020
Fakulteti i Filologjisë i Universitetit “Ukshin Hoti”, më 24. 02. 2020, organizoi përurimin e librit "Shoqëri e të Shtypuri Shkronja shqip" (Përmbledhje studimesh dhe artikujsh). Me rastin e 140-vjetorit të themelimit 1879–2019, mbështetur nga ALSAR-i, Tiranë, 2019.
Në këtë veprimtari shkencore, Prof. ass. dr. Ragip Gjoshi (dekan i Fakultetit të Filologjisë), si mikpritës i veprimtarisë, vlerësoi lart bashkëpunimin me profesorët (studiuesit e mirënjohur nga Tirana) dhe vuri në dukje rëndësinë dhe peshën e Shoqërisë së Stambolli dhe rolin e saj vendimtar në Kongresin e Manastirit (1908). Më pas për librin folën: Prof. ass. dr. Flamur Shala, Prof. dr. Xhevat Lloshi, Prof. dr. Emil Lafe dhe Prof. dr. Rami Memushaj nga Shoqata e Gjuhësisë Shqiptare. Më pastaj, z. Mehdi Gurra, drejtor i Fondacionit ALSAR, foli për veprimtarinë e Fondacionit dhe për mundësitë që mund të ofrojë ALSAR-i për studentë e profesorë të Universitetit “Ukshin Hoti”, për të botuar studime e monografi jo vetëm nga fusha e albanologjisë, por dhe nga disiplina të tjera shkencore.
Pas përurimit të librit, Prof. dr. Besim Kabashi, profesor i gjuhësisë kompjuterike në Universitetin e Erlangen-Nyrenbergut, mbajti një ligjëratë me titull “Një korpus për gjuhën shqipe”. Në këtë ligjëratë, prof. Kabashi vuri në dukje domosdoshmërinë për ndërtimin e një korpusi të shqipes, i cili jo vetëm që do të pasuronte fjalorin e shqipes, por edhe do t’i mundësojë shqipes që të jetë edhe ajo pjesë e zhvillimeve moderne. Sipas tij, zhvillimet e informatikës, të kompjuterizmit duan një korpus të përpunuar e të pasur të një gjuhe që ajo të jetë në hap me zhvillimet tekonologjike. Ai gjatë ligjëratës tha se me punën e tij vetanake ka arritur të krijojë një korpus të shqipes mbi 200 milionë fjalëforma. Prof. Besim Kabashi vuri në pah vullnetin e tij për bashkëpunim në këtë fushë të dijes me Universitetin “Ukshin Hoti” që, ndër ne, ende mbetet disiplinë shkencore e panjohur.
Krejt në fund të kësaj veprimtarie, prodekani i Fakultetit të Filologjisë, Prof. ass. dr. Xhafer Beqiraj, në emër të Fakultetit të Filologjisë falëndroi për kontributin shkencor dhe për bashkëpunimin me Fakultetin e Filologjisë të Universitetit “Ukshin Hoti”, doajenët e gjuhësisë shqiptare (Lingua Albanica): Prof. dr. Emil Lafen, Prof. dr. Xhevat Lloshin, Prof. dr. Rami Memushajn Prof. dr. Enver Hysajn (i cili nuk ishte i pranishëm për shkaqe shëndetësore, po u lexua kumtesa e tij); z, Mehdi Gurrën (e falënderoi për vullnetin e mirë dhe për bashkëpunimin), Prof. dr. Besim Kabashin (e falënderoi për gatishmërinë për bashkëpunim me UPZ-në) dhe të gjithë të pranishmit.
