Rektori Vataj kërkon nga KEDS-i furnizim 24 orë me energji elektrike për UPZ-në
05 Nëntor 2014
Rektori i Universitetit “Ukshin Hoti” në Prizren, Prof. Dr. Ramë Vataj të mërkurën ka pritur në një takim përfaqësuesit e KEDS-it në Prizren, nga të cilët ka kërkuar që të kujdesën që Universiteti të ketë furnizim me energji elektrike prej 24 orësh. Rektori Vataj theksoi se UPZ nga ana e tyre do të kryejë të gjitha obligimet në afat ligjorë që kjo të realizohet dhe kërkoi edhe nga ana e KEDS-it që të bëjë të njëjtën gjë. Drejtori i KEDS-it për Rajonin e Prizrenit, Vehbi Sofiu, pasi që e uroi rektorin Vataj për detyrën, duke i dëshiruar sukses në punë, e siguroi se do të diskutojnë çështjen me menaxhmentin qendrorë të KEDS-it dhe do të bëjnë ç’është e mundur nga ana e tyre që UPZ të ketë furnizim me energji elektrike pa ndërprerë sa më parë.
UPZ ka nënshkruar kohë më parë një momerandum mirëkuptimi me ish-KEK-un, për këtë çështje ndërsa tani pasi që kanë ndryshuar rrethanat në kompani sa i përket statusit, është parashtruar nevoja që të ripërtërihet marrëveshja ku do të vendoseshin detyrimet dhe obligimet e secilës palë që kjo të realizohet në një afat sa më të shpejtë.
Ndërkaq Rektori Vataj e potencoi faktin që zhvillimi normal i procesit mësimorë dhe të gjitha punët administrative është i lidhur ngushtë me furnizimin e rregullt me energji elektrike. Ai gjithashtu theksoi se ndërprerjet e energjisë elektrike kohëve të fundit janë reflektuar edhe në mbarëvajtjen e mësimit dhe kanë ndikuar në rritjen e shpenzimeve të Universitetit për furnizim me energji elektrike duke shfrytëzuar rrugët alternative të furnizimit me gjenerator.
Prizren, më: 05.11.2014
