Në Universitetin “Ukshin Hoti” u promovuan dy libra të rëndësishëm
28 Tetor 2016
Në Universitetin “Ukshin Hoti” në Prizren, të premten janë promovuar dy libra. Libri më i ri apo, i 18-ti me radhë me titull “Abc-ja e së drejtës dhe shtetit” nga Prof. Dr. Kadri Kryeziu, i cili është prorektor në UPZ dhe profesor në Fakultetin Juridik në këtë universitet dhe në disa universitete tjera, dhe libri me titull “Hoti në rrjedhat e shekujve”– përmbledhje e kumtesave të cilat janë prezantuar në një konferencë në ShBA. Me rastin e promovimit të këtyre librave në dy ceremoni ndaras kanë marrë pjesë qindra mysafirë, përfaqësues nga të gjitha institucionet shtetërore qendrore dhe lokale, shoqërisë civile, etj.. Me këtë rast Rektori i UPZ-së, Prof. Dr. Ramë Vataj theksoi se universiteti të cilin e drejton ka nderin e veçantë si vatër e dijës që të promovon libra të cilat janë në interes të studentëve dhe komunitetit akademik siç është libri i profesorit Kryeziu dhe librin me përmbledhje të kumtesave për Hotin, fis i cili ka nxjerrë veprimtarin e çështjes kombëtare dhe intelektualin Ukshin Hoti, emrin e të cilit e mban me krenari Universiteti.
Për librin e prorektorit Kryeziu folën recensentët, Prof.Dr. Jusuf Zejneli dhe Prof. Dr. Fejzulla Berisha dhe kryetari i Parlamentit Studentor, Arianit Berisha, të cilët e vlerësuar lartë librin në fjalë dhe kontributin e tij si në çështjen kombëtare ashtu edhe në shkencë.
Ndërkaq, për përmbledhjen e kumtesave në librin “Hoti në rrjedhat e shekujve” folën: Prof. Dr. Mahir Hoti, duke prezantuar edhe kumtesën me temë “Vendi i trevës së Hotit në historinë e kulturës shqiptare”, pastaj Prof. Dr. Haki Kasumi, kumtesën me temë: “Ukshin Hoti si pjesëtar i veçantë i kësaj familje” dhe Prof Dr. Izer Hoti foli për nismën që duhet vijuar.
