Universiteti “Ukshin Hoti” në Prizren lidhi marrëveshje bashkëpunimi me Ministrinë e Ambientit dhe Planifikimit Hapësinor

Universiteti “Ukshin Hoti” në Prizren lidhi marrëveshje bashkëpunimi me Ministrinë e Ambientit dhe Planifikimit Hapësinor

Universiteti “Ukshin Hoti” në Prizren, ka arritur marrëveshje bashkëpunimi me Ministrinë së Mjedisit dhe Planifikimit Hapësinor. Marrëveshja përkatëse është nënshkruar të mërkurën, mes Rektorit në UPZ Prof. Dr. Ramë Vataj dhe u. d. Ministrit të MMPH-së, Prof. Dr. Ferat Shala.

Rektori Vataj e falënderoi ministrin Shala për gatishmërinë që të arrihet marrëveshje e bashkëpunimit në mes të dy institucioneve.

“Me këtë marrëveshje studentët tanë do të kenë mundësi të bëjnë praktikë në Ministrinë e Mjedisit dhe Planifikimit Hapësinor, por edhe t’i shfrytëzojmë parqet nacionale, sepse ne kemi një program i cili është unik në Kosovë”, ka thënë Vataj, duke shtuar se kjo shkon në funksion të hapjes së drejtimeve të reja në Fakultetit e Shkencave të Jetës dhe Mjedisit në UPZ.

“Studentët përveç që do të kenë mundësi të bëjnë praktikë, ne do të kemi mundësinë që Ministrisë t’i ofrojmë konsulencë, apo pjesëmarrje aktive të legjislacionit për fusha të caktuara, me të cilat Universiteti ka kompetencë”, ka shtuar ai.

Ndërsa, ushtruesi i detyrës së ministrit të MMPH-së, Prof. Dr. Ferat Shala, e falënderoi Rektorin Vataj për gatishmërinë e pritjes së bashkëpunimit që të rritet shkalla e bashkëpunimit në nivel zyrtar.

“Ministria e Mjedisit dhe Planifikimit Hapësinor po konkretizon marrëveshjet të cilat do të hapin shteg të rëndësishëm në bashkëpunimin ndërinstitucional, ku shkenca dhe menaxhimi do të jenë pjesë përbërëse e planifikimit tonë, ku shkenca dhe rinia do të jenë ata që do të dhënë kontributin maksimal jo vetëm në përgatitjen e tyre, por edhe në dhënien e vlerave shkencore dhe akademike në bashkëpunimin ndërinstitucional, në fushën e menaxhimit të parqeve të planeve urbane dhe shumë sfera tjera që ky universitet ka në kuadër të vet kapaciteteve shkencore akademike”, ka thënë Shala.