Studentët e UPZ-së kanë dhënë një shfaqje për nxënësit në edukimin parashkollor në Institucionin parashkollor “Melodia” në Therandë
17 Dhjetor 2015
Studentët e Fakultetit të Edukimit në Universitetin “Ukshin Hoti” në Prizren, kanë dhënë një shfaqje për nxënësit në edukimin parashkollor në Institucionin parashkollor “Melodia” në Therandë. Me këtë rast nxënësit i dhuruan Rektorit të UPZ-së, Prof. Dr. Ramë Vataj logon e UPZ-së, të punuar nga dora e tyre.
Përralla “Bukuroshja e fjetur” nga studentët e vitit të katërt programi- parashkollor, u inskenua nga Ilir Muharremi regjisor dhe profesor i lëndës: Dramatizimi dhe shfaqjet me kukulla. Shfaqja u dha në amfiteatrin e madh të Fakultetit të Edukimit në Universitetin e Prizrenit. Kjo shfaqje qe si rezultat i kësaj lënde duke promovuar në skenë: tekstin e dramatizuar, lojën e aktorëve, lëvizjet skenike, lojërat skenike, regjinë, kostumografin, skenografinë si dhe muzikën. Në shfaqje ishin të pranishëm fëmijët nga kopshtet........
Rrëfimi i përrallës: Na ishin njëherë një mbret dhe një mbretëreshë që iu përmbushën të gjitha ëndrrat ditën që u lindi një vajzë yll e bukur. Për të festuar pagëzimin e vajzës, ata ftuan të gjitha zanat nga të katër anët e mbretërisë. Po në festë na kishte ardhur edhe një shtrigë e paftuar dhe, për ta prishur gëzimin, u hodh e tha se vogëlushja do të shpohej me majën e furkës dhe do të vdiste. Po, për fat të mirë, zanat që qenë aty, e zbutën mallkimin dhe thanë:
-Bija juaj nuk do të vdesë, veç do të bjerë në gjumë të thellë, prej të cilit ka për ta zgjuar një princ.
